Gibutyag ni 1st District Representative Leandro Leviste atol sa iyang interview karong Agosto 26, 2025 nga ang inhenyerong mitug-an sa paghatag og suhol kaniya, angay lamang nga ipatestigo aron masuta ang nagpadayon nga korapsyon sa Department of Public Works and Highways (DPWH) nga nagapalubog sa nasud.
Matod pa ni Leviste, gawas sa maong inhenyero, gina-awhag usab niini ang mga empleyado sa DPWH ug mga kontraktor nga adunay kahibalo sa anomalya sa ahensya nga mangahas sa pagpamatuod. Kini aron mas mapalig-on ang imbestigasyon ug masiguro nga ang depektibong mga proyekto maila ug maayohan dayon nga dili na makadugang ug gasto sa kaban sa gobyerno.
Kabahin niini, giatubang sa maong inhenyero ang kaso nga naglakip sa Direct Bribery, Corruption of Public Officials, Anti-Graft and Corrupt Practices Act, ug paglapas sa Code of Conduct and Ethical Standards for Public Officials. Bisan pa niini, posible kining mahimong state witness aron motabang sa pagpanukiduki ug pagpangita sa mas dagkong personalidad nga nalambigit sa kaso.
