-- ADVERTISEMENT --
DAVAO CITY - Kasong homicide ang atubangon sa driver sa pick up nga nibangga patay sa usa ka empleyado sa Water District. Nahitabo ang insidente pasado alas 4 sa kaadlawon sa may Quimpo Boulevard, Davao City.
Giila sa Traffic Enforcement Unit ang suspek kinsa driver sa pick up nga si Sher Lauraine Abano, 26-anyos, call center agent kinsa residente sa Mintal, Davao City.
Sa police investigation, nagbaybay sa Quimpo Boulevard ang pick up gikan sa Matina area, diin kalit kining nibalhin sa laing lane hinungdan nga nabundol niini ang biktima nga giilang si Pedrito Dizon, kinsa empleyado sa Davao City Water District.
Gumikan sa kakusog sa impact nalagpot pa og pila ka metros ang biktima nga nagresulta sa iyang hinanaling kamatayon. Samtang nawad-an usab og kontrol ang pick-up hinungdan nga mibangga kini sa nakaparada nga L300 Van una kini misungag sa poste sa pader. Sa pikas bahin gilayong nitahan sa kapulisan si Abana. Sa karon gikuha na sa kabanay ang patay'ng lawas sa biktima.
