Nanguna ang Filipino American Olympian nga si Emma Malabuyo sa US National Collegiate Athletic Association (NCAA) season sa pagpakita niini sa kahanas alang sa University of California, Los Angeles (UCLA) Bruins.
Ang sports event gihimo sa Big Ten Conference women’s gymnastics showdown batok sa Michigan State Spartans ug nakadaog kini isip kampeon sa balance beam nga adunay impresibong meet-winning average score nga 9.925.
Dili mahitupngan ang performance ni Malabuyo sa beam, sa katapusan nga rotation floor, nakaiskor kini og 9.95, nga nagtimaan sa kadaugan sa UCLA nga engkuwentro.
Si Malabuyo giubanan sa kompetisyon ni Olympic gold medalist Jordan Chiles ug kauban sa team nga si Chae Campbell, kinsa pareho nga nakapuntos og perpektong 10.0.
Samtang, sa post sa B1G Gymnastics, makita sa video ang flawless routine ni Malabuyo sa beam, nga midayeg sa dalaga ug gi-captionan kini og, “Practice makes perfect for Emma Malabuyo & UCLA Gymnastics on beam.”
Ang maong kadaugan, misaka si Malabuyo sa 4th place sa 2025 NCAA balance beam rankings, nga nagpalig-on usab sa status niini isip usa sa mga top gymnast sa nasud.
