DAVAO CITY – Gigahinan sa Government Service Insurance System kon GSIS og emergency loans fund ang mga aktibong myembro sa mga probinsya sa Davao del Norte ug Davao de Oro, lakip na sa mga lungsod sa Caraga ug Governor Generoso sa Davao Oriental, nga naapektuhan sa mga niaging katalagman.
Sumala ni Wick Veloso, ang presidente ug general mangager sa buhatan, nasa P814 million alang sa kapin 36,000 ka mga myembro ug dul-ang 5,000 ka mga pensioners gikan sa mga nahisgutang lugar nga biktima sa mga nahitabong linog ug pagbaha ang mamahimong makabenepisyo niini.
Ang mga miyembro nga adunay kasamtangan nga balanse sa emergency loan, mahimong makahulam hangtod sa P40,000 aron mabayran ang ilang miaging balanse sa emergency loan ug makadawat sa maximum net nga nagkantidad og P20,000.
Samtang, ang mga pensioner ug kadtong walay kasamtangan nga emergency loan mahimong mo-apply og loan nga mokabat sa P20,000.
Gikanayon sab ni Veloso nga kadtong mga tigulang ug disability pensioners nga nagpuyo sa mga nasangpit nga dapit ang mamahimo sab nga maka-avail sa loan basta ang ilang net monthly pension paghuman sa ilang kasamtangang loan kay labing menos sa 25% sa ilang basic monthly pension.
Gagmay lamang sab ang monthly amortization niini alang sa mga buot mukuha ang maong loan.
Nagpahinumdom sab ang buhatan nga mamahimo silang magproseso pinaagi sa GSIS Touch app nga ma-download sa ilang mga smartphone.
Aduna lamang hangtud Mayo 27 ang mga myembro nga makapasa sa ilang mga loan applications.
via || Bombo LJF
