Gilimod sa tech billionaire nga si Elon Musk ang taho nga siya kuno naggamit og ketamine ug uban pang klase sa druga panahon sa 2024 Presidential elections.
Sa usa ka post sa X (kaniadto Twitter), kusganong giingon ni Musk nga bakak ang mga pasangil batok kaniya.
Giklaro pa ni Musk nga dugay na siyang wala moinom og ketamine ug kini reseta lamang kaniadto alang sa iyahang mental health.
Namatikdan sab sa publiko ang bun-og sa iyahang mata human siya mibiya isip labaw sa Department of Government Efficiency (DOGE), usa ka buhatan nga gimugna ilawom sa administrasyon ni Trump.
Pahayag pa ni Musk, nga ang pasa sumala pa gikan sa aksidenteng pagsumbag sa iyahang nawong sa iyang anak nga si “X” samtang sila nagdula.
Sa dihang gipangutana si Trump kabahin sa maong alegasyon sa regular nga paggamit og druga ni Musk, mitubag kini og, “I wasn’t (aware),” apan giila gihapon niya nga lahi ug talagsaon ang personalidad ni Musk.
