Nakabsan sa kinabuhi ang usa ka electrician human nga aksidente sumala pa nga napusilan ang kaugalingon samtang gikuha ang armas sa kainom nga City Councilor sa dakbayan sa Digos pasado alas-10:40 sa miaging gabie.
Subay sa inisyal nga imbistigasyon sa kapulisan nga nahitabo kini sa Purok Kamansi, Aurora Extension, Brgy. San Miguel, syudad sa Digos.
Subay sa report, pasado alas 12:00 sa tungang gabii gitaho ni Jumawan ang aksidente sa pagpabuto sa pusil sulod sa iyahang compound.
Giila ang mga biktima nga sila Arniel Seguismar Dela Cerna, 53 anyos, Electrician ni Konsehal Jumawan, residente sa Lapu-Lapu Ext., Zone III, Digos City ug si Moises Bueno 30 anyos, ulitawo, residente sa Lim Ext., Teachers Village, Zone III, Digos City.
Sa inisyal nga imbistigasyon, nasayran nga alas 10:40 Martes sa gabii nahitabi ang krimen sa sulod mismo sa nasampit nga lugar nga adunay usa ka Edmark Sumampan 31 anyos nga taga Purok Sampalok, Lapu2x Ext., Brgy. San Miguel nga gikanayon nga nag inom sila sa mga biktima kauban si Konsehal Edmund Jumawan ug usa ka Jamil Comablay.
Sumala pa nga samtang nakatulog si Jumawan, gikuha ni Arniel Dela Cerna ang License Firearms sa Konsehal nga anaa sa likod nga bahin sa hawak niini, apan aksidente sumala pa kining nakablit hinungdan nga nibuto kini og na-igo sa wala nga bahin sa paa ug samtang kaduha na-igo sa tuo nga bagtak si Moises Bueno.
Sumala pa gilayon nga gidala sila sa Davao del Sur Provincial Hospital (DSPH) apan si Arnel Dela Cerna nga maoy aksidenteng nakapabuto sa armas, gi-deklarang Dead on Arival matud pa sa duty physician nga si Dr. Hilbert Alesna tungod sa massive loss of blood gumikan sa samad pinusilan nga nahiagoman.
Atol sa crime scene nga gipahigayon sa Davao del Sur Forensic kon SOCO. narekober ang usa (1) ka Glock 40 S&W nga adunay serial number ADNU091 nga nakarehistro sa pangalan sa nasampit nga Konsehal ug mga basyo sa bala.
Sa pagkakaron, gipalawoman pa sa kapulisan ang maong panghitabo.
