Miusbaw og 5.4% ang ekonomiya sa Pilipinas sa unang tulo ka bulan sa tuig 2025, sumala sa Philippine Statistics Authority (PSA), nga mas taas kini kung itandi sa 5.3% nga GDP growth sa kataposang bahin sa 2024.
Sumala pa ni PSA Undersecretary Dennis Mapa, ang quarter-on-quarter nga pagtubo ang naa sa 1.2%, nga gipangunahan sa manufacturing, retail trade, ug konstruksyon. Bisan pa man nga kini mas ubos kung itandi sa 5.9% nga pagtubo sa susama nga panahon sa miaging tuig, apan gikanayon sa National Economic and Development Authority (NEDA) nga kini usa ka timailhan sa “lig-on nga paglambo” taliwala sa kawalay kasiguruhan sa tibuok kalibutan nga ekonomiya tungod sa tensiyon sa negosyo tali sa U.S. ug uban pang mga nasud.
Subay sa report nga ikaduha ang Pilipinas sa labing paspas nga pagtubo sa ekonomiya sa Asya sa unang quarter sa 2025, sunod sa Vietnam (6.9%) ug susama sa China (5.4%). Matod usab ni Undersecretary Rosemarie Edillon sa NEDA, kinahanglan nga makab-ot sa nasud ang 6.2% nga pagtubo sa nahibiling mga quarter aron maabot ang target nga 6% alang sa tibuok tuig.
Gidasig usab niini ang pagpahugot sa kooperasyon sa hisgutanang pamatigayon sa European Union, United Arab Emirates (UAE), ug Estados Unidos.
