Gipahimutang sa legal counsel sa extrajudicial killings (EJKs) ug human rights lawyer nga si Neri Colmenares ang duha ka legal nga basehan aron ipadayon sa International Criminal Court (ICC) ang imbestigasyon ug posibleng pagtaral batok kang kanhing Pangulong Rodrigo Duterte, bisan pa man nga mibulag na ang Pilipinas sa Rome Statute niadtong 2019.
Una, sumala sa abogado, ubos sa Article 127, nagpabilin ang obligasyon sa nasud sa mga kaso nga gisugdan samtang miyembro pa kini sa Rome Statute, lakip na ang preliminary examination nga gisugdan niadtong 2018.
Ikaduha, gibutyag sa abogado nga giila sa gobyerno ang hurisdiksyon sa ICC pinaagi sa ilahang mga aksyon, lakip ang pagsumite og mga dokumento niadtong 2021 ug 2022 nga nangayo og pagpasibog sa imbestigasyon.
Apan, nagpasidaan si Atty. Colmenares nga kon paboran ang kampo ni Duterte, posible nga maengganyo ang ubang lider nga malikayan ang mga tulubagon pinaagi sa pag-withdraw sa ICC.
