DAVAO CITY – Malugwayan ug usa ka semana o hangtud Abril 26, 2020 ang gipatuman nga enhanced community quarantine sa Davao region lakip na ang dakbayan.
Kini mismo ang gikumpirma ni Davao City Mayor Inday Sara Duterte Carpio.
Kahinumduman nga matapos na unta ang ECQ karong Abril 19 apan nahisgutan nga lugwayan pa kini gumikan sa sitwasyon sa siyudad kalabot sa kaso sa Covid-19.
Gitino sa Mayor nga ilalom sa extended ECQ, ang mga utlanan sa siyudad magpabilin nga sarado gawas lamang sa vital cargoes ug emerhensiya.
Nagpasabot sab kini nga pabilin nga sarado ang mga tugpahanan ingon man pantalan sa dakbayan.
Subli nga gibutyag sa opisyal nga walay makasulod sa dakbayan apan mamahimo nga makagawas apan dili na makabalik.
Gihimo sumala pa ang extension tungod sa natalang tulo ka mga bag-ong kaso sa covid-19 sa siyudad.
Gitambongan ang ilang gipahigayon nga tigom sa mga gobernador ug Mayor sa Davao region. Na-obserbahan sumala pa sa mga government doctors nga adunay fluctuation sa Covid-19 incidents dinhi sa rehiyon.
