DAVAO CITY – Angayan lamang sumala pa nga kondinahon ang mga miyembro sa New People’s Army (NPA) gumikan sa mga daghanang kalapasan niini sa tawhanong katungod ingon man sa International Humanitarian Law (IHL) gumikan sa ilang gihimong nga pagpangatake sa mga kasundalohan ug inosenteng sibilyan ilabi na ang mga bata.
Kini ang pahayag ni Lt. Gen. Jose Faustino, Jr., Commander sa Eastern Mindanao Command, human nga nakarekober ang mga sakop sa 25th Infantry Fireball Battalion (25IB) ug mga landmine sa Sitio San Agustin, Brgy. New Calape, Montevista, Davao de Oro sa milabay nga adlaw.
Sumala pa kang 25IB Commander Lt. Col. Asnawi Muti nga ila kining nadiskobrehan human nga ang usa ka alyas don, usa ka rebel returnee nga gigamit sumala pa nga courier sa NPA sa Agusan del Sur ug Davao De Oro ang nagtudlo sa lokasyon sa landmine depot sa Sitio San Agustin.
Gawas sa 23 landmines narekober sab ang tulo ka mga 25 kg improvised explosive devices (IED), walo ka 15 kg IEDs, ug dose ka 5 kg IEDs kalakip na ang duruha ka Garand rifles ug 15 pieces sa blasting caps.
Kahinumduman nga sa milabay nga mga semana, pipila ka mga kanhi miyembro sa NPA ang mitahan sa ilang units ilalom sa Eastern Mindanao Command diin nadiskobrehan usab sa otoridad ang mga armas ug uban pang mga butang nga iya sa mga rebelde.
Apan ang kanunay sumala pa nga paggamit ug landmines sa mga NPA sulod sa pipila ka mga dekada ang usa ka pagpamatuod nga nakahimo ug dakong kalapasan ang mga nahisgutan dili lamang dinhi sa nasod kung dili lakip na sa international community.
