Makasinati og kasarangan hangtud sa kusog nga pag-ulan gumikan sa padayon nga pagsulbong sa Easterlies ang pipila ka bahin sa Mindanao, ilabi na sa Davao Region.
Sumala pa sa Philippine Atmospheric, Geophysical, and Astronomical Services Administration (Pagasa) nga daghang bahin sa Eastern Visayas, Caraga, Davao Region, ug Soccsksargen ang makasinati og posibleng kalit nga pagbaha o pagdahili sa yuta gumikan sa kasarangan ngadto sa kusog nga pag-ulan.
Nagpasidaan usab kini sa mga residente dinhi sa maong mga lugar nga mangandam sa kaugalingon alang sa mga emerhensiya.
Nagpahibalo usab ang state weather bureau nga ang Northeast Monsoon o labing nailhan nga “Amihan” magdala og mga pag-ulan sa pipila ka bahin sa Luzon samtang ang uban pang mga lugar sa nasud makasinati og “partly cloudy to cloudy” nga kalangitan uban ang katag nga mga pagpanaligsik gumikan sa Easterlies.
Samtang, kagahapong adlawa pipila ka mga barangay ning dakbayan sa Davao ang nagsuspende sa ilang mga klase gikan sa basic education ngadto sa college level ug nagpahigayon na lamang og “blended learning” gumikan sa pagkadaot sa panahon.
Samtang aduna usab nga nahitabong gamay nga pagdahili sa yuta sa Mawab, Davao de Oro.
Ang Municipal Disaster Risk Reduction and Management Office-Mawab (MDRRMO-Mawab) miabiso sa tanan nga mga motorista nga nagabiyahe sa Purok 16, National Highway, Barangay Poblacion nga magmaneho nga mainampingon gumikan sa maong panghitabo.
Kahinnumdoman atong mga milabayng adlaw, gikanayon sa Pagasa nga adunay tulo ka weather systems nga gitakdang magdala og managlahing lebel sa ulan sa tibuok nasud kon diin usa niini posibleng makamugna og tropical cyclone sulod sa Philippine Area of Responsibility atol sa bulan sa Enero.
Kung madayon man nga mamahimo kini nga bagyo posibleng moigo kini sa yuta duol sa Eastern Visayas o sa Caraga Region.
