Wala mipabor si Philippine National Police (PNP) chief Gen. Rommel Francisco Marbil sa amando-an ni kanhi pangulong Rodrigo Duterte sa kapulisan nga aghaton ang mga kriminal nga mosukol aron adunay hinungdan nga patyon ang mga nahisgutan.
Kini ang adunay kalabutan sa mga alegasyong extrajudicial killings sa gilusad nga giyera batok sa iligal nga droga ni Duterte.
Sayop ang nahisgutang kamando-an gumikan kay gikinahanglang respetuhon ang tawhanong katungod, matod pa ni Marbil.
Dugang gipahayag sa opisyal nga sa pagkakaron, gusto ni presidente Ferdinand Marcos jr. nga respituhan ang human rights ug ipreserba ang kinabuhi sa tawo.
Dugang pa niini, gikinahanglang sundon sa kapulisan ang balaod partikular na ang mga elemento sa self-defense una mupatay ug kriminal.
Dili mauna ang provocation, gikinahanglan nga addunay unlawful aggression.
Samtang makigtinabangay kuno ang Quad Committee sa kamara ngadto sa Department of Justice (DOJ) aron mahatagan ug hustisya ang libo-an ka mga biktima sa EJK sa war on drugs sa nakalabayng administrasyon.
Gipahayag ni Manila Rep. Bienvenido Abante Jr. ug Laguna Rep. Dan Fernandez, pulos co-chairperson sa Quad Committee, mamahimong gamiton sa National Prosecution Service sa DOJ ang mga ebidensyang nakuha sa komite aron makasuhan ang mga nagpaluyo sa EJK.
Matod pa ni Rep. Abante, dili lamang ang mga nalambigit sa iligal nga droga ang naapektuhan sa kampanya ni Duterte apan lakip na ang mga sibilyan ug lakip na niini ang mga bata.
Dugang pa sa magbabalaod nga adunay gisulti nga collateral damage.
Collateral ba ang napatay nga tres-anyos, napatay nga 9-anyos? pangutana sa kongresista.
Samtang gisuportahan ang kampanya batok sa droga, gikanayon niini nga kwestyunabli ang pamaagi nga gigamit sa nakalabayng administrasyon.
Mamatikdan usab nga gagmayng user ug pusher gikan sa pobreng komunidad ang kadaghanan sa mga nangamatay ug gamay lamang ang high profile drug lords.
