DAVAO CITY – Gikabalaka sa mga mamaligyaay ang nihit na baligya karon sa durian, nga usa pa hinuon sa mga ginapangita sa mga lokal ug mga langyaw karung panahon sa Kadayawan diri sa dakbayan sa Davao.
Sa Bangkerohan Public Market, anaa na sa P90 ang matag kilo sa durian ug posibleng musaka pa hangtud P120 matag kilo sa mga taas nga variety sa durian sama sa puyat ug aroncillo.
Samtang sa ubang klase sa durian, mubalor lamang sa P70 hangtud P80 matag kilo. Gitudlong hinungdan sa pagmahal sa presyo sa durian ang mubo nga supply niini karung tuig, ug ang nagpadayong pagsaka sa presyo sa lana.
Kahinumdumang nagbahad ang Davao City Agriculturist’s Office nga mikunsad ang produksyon sa durian diri sa dakbayan tungod sa pabag-o bag-o nga klima nga miresulta sa gamayng tres mil metriko toneladang na-ani karung tuig. Mubo kini kun itandi sa dose mil metriko tonelada sa durian sa miaging tuig.
Nakitang pamaagi sa ahensya nga mag-import ug durian gikan sa uban pang mga durian growers sa kasikbit ug ubang probinsya aron mapuno ang gikuwangon alang sa libuan ka mga bisitang mudagsa karung Kadayawan.
VIA || Bombo LJ Florendo
