DAVAO CITY – Miabot sa 925 ka mga pamilya kon 4,425 ka mga indibiwal sa Davao de Oro ug Davao Oriental ang apektado sa pagkuso-kuso sa Bagyong Kabayan.
Sumala sa OCD 11, gikan sa maong ihap sa mga apektadong pamilya, 757 ang gikan sa lima ka barangay sa Davao Oriental ug 168 gikan sa upat ka barangay sa Davao de Oro.
Anaa sa 314 ka mga pamilya ang nagpundo sa mga evacuation centers.
Samtang gikumpirma sab sa OCD 11 nga dunay usa ka lalaki nga na-missing atol sa mga pagbaha gikan sa Manay, Davao Oriental diin dihaa unang nag-landfall ang bagyo niadtong Lunes una pa man kini nahimong LPA.
Kasamtangan pang ginapangita ang na-missing nga lalaki nga gikataho ni Major Meliton Sango nga wala nitamod sa mga governnment warnings ug naanod sa baha atol sa iyang pagpanguha og lubi sa lugar.
Samtang, nahugmak sab ang usa ka tulay sa Barangay Lamiawan, Caraga gumikan sa kusog nga pagbaha ug landslides.
Natabunan sab ug nidahili nga yuta ang mga kabalayan sa mga katutubong Mangyan human nahugno ang tulay sa Lamiawan nga bugtong nagkonekta sa Poblacion area.
Stranded karon ang anaa sa 7,000 ka mga tawo nga na-isolate gumikan sa pagkaguba sa tulay.
Nagpabiling nihit ang suplay sa kuryente sa mga dapit. Natala sab ang daghanang mga nangaguba nga mga dalan sa duha ka probinsya nunot sa mga baha ug pagkaguba sa 12 ka mga balay diin 2 ang totally damaged.
Nagalusad sab ang mga otoridad og rescue ug clearing operations alang sa mga apektadong residente. Ginasubay pa sa OCD 11 ug LGUs ang kinatibuk-ang danyos sa epekto ni Bagyong Kabayan.
