DAVAO CITY – Mikabat sa 194 ka mga pamilya ang anaa na karon sa evacuation centers atol sa mga pagbaha sa managlahing dapit sa dakbayan sa Davao gumikan sa mga pag-ulan nga epekto sa Trough sa Low Pressure Area.
Subay sa talaan sa Davao City Police Office, kasagaran sa mga apektadong residente ang nahimutang sa mga barangay sa 5-A, 8-A, 19-B, Talomo, Tigatto, Purok 2A ug 7C Bunawan, Barangay 74-A, Matina Crossing ug Maa.
Sa pagkakaron, nagpabiling suspendido ang klase sa mga pampubliko ug pribadong tulunghaan sa dakbayan ug nagpabiling anaa sa WFH arragement ang mga opisina sa gobyerno sa syudad.
Gimando sa buhatan ang pre-emptive evacuation sa mga komunidad sa daplin sa suba sa Barangay Tamugan tungod sa pag-apaw sa Davao River nga nilapas na sa critical level bandang alas-3 sa hapon kagahapon.
Gimando usab sa CDRRMO ang pre-emptive evacuation sa mga komunidad sa daplin sa suba sa Barangay Bunawan gumikan sa pag-apaw sa Bunawan River.
Sa laing bahin, naghangyo si CDRRMO Administrative and Training Chief Lyndon Ancajas ngadto sa katawhan nga mutahud sa mga opisyal nga anusyo sa buhatan alang sa pre-emptive and forced evacuation atol sa mga pagbaha alang sa kaluwasan.
Gimanduan na sab nila ang matag Barangay Disaster Risk Reduction and Management Councils alang sa pag-andam sa mga evacuation centers nga temporaryong puy-an sa mga apektadong residente, ingon man ang pagpahigayon og recorrida in sa mga flood ug landslide prone areas sa dakbayan.
Gipasaka na sa code red status ang ubang bahin duol sa Davao River nunot sa pagsaka sa lebel sa tubig baha sa maong suba.
Gipatingog na sab ang mga sirena sa mga river channels aron magmando sa mga residente nga maghikling na ngadto sa mga evacuation centers.
Suspendido sab ang byahe sa mga motor bancas partikular na sa may SIR Matina, sigon sa Coast Guard Southeastern Mindanao.
Gikataho sa Office of the Civil Defense (OCD) Davao nga 394 ka pamilya o 1,411 ka indibidwal ang apektado sa low-pressure area (LPA) sa rehiyon partikular na sa Davao de Oro ug Davao Occidental.
