Dul-an tunga sa milyon ang nakumpiska nga iligal nga droga kon shabu atol sa gilusad nga drug buybust operation sa mga operatiba sa Philippine Drug Enforcement Agency kon PDEA.
Subay sa report gikan sa mga otoridad, usa ka big-time nga tulisig ang ilahang gipahigayon sa pagpanguna sa Regional Special Enforcement Team (RSET) sa Philippine Drug Enforcement Agency (PDEA) Regional Office 11, kauban ang National Bureau of Investigation Southeastern Mindanao Regional Office (SEMRO) sa Purok Silad, Barangay Mandug, Davao City, pasado alas 4:00 kagahapon sa hapon.
Ang suspetsado nga nailhan lamang sa alyas nga “Jhonny,” 44 anyos ug lumulupyo sa maong lugar, nadakpan ang nahisgutan human kini nakabaligya og usa ka pakete sa iligal nga droga kon shabu nga nagkantidad og ₱8,000 ngadto sa usa ka undercover agent nga nagpakaaron-ingnon nga mamalitay.
Samtang nakuha usab sa mga otoridad atol sa operasyon ang unom (6) ka mga pakete nga adunay sulod nga gidudahang shabu nga adunay gibug-aton nga mokabat sa 51 ka gramos, nga gibanabanaan nga nagkantidad og ₱408,000.
Lakip usab nga nasakmit ang marked money nga gigamit sa buy-bust operation.
Giandam na karon ang mga kasong kriminal batok sa suspetsado ilawom sa Republic Act No. 9165, nga mas nailhan isip Comprehensive Dangerous Drugs Act of 2002.
