Gipasakahan na og kaso ang suspek nga ika-9 sa listahan sa dakbayan sa pagpayuhot og iligal nga droga kon shabu nga nakumpiskahan ug dul-an 2 milyon atol sa drug buybust operation.
Kasong pagsupak sa RA 9165 ang gi-atubang sa suspek tungod sa iligal nga binuhatan nga gipasaka sa piskalya sa Ecoland ning syudad sa mga operatiba sa Baliok Police Station.
Giila ang dinakpan nga si alyas “Bords” ug kaipon nga nakuhaan og iligal nga droga nga nagkantidad og P1,802,000 nga standard drug price niini. Kahinumduman nga gipahigayon ang drug buybust operation sa Keith Williams, Barangay Catalunan Pequeño, ning dakbayan sa Davao pasado alas Otso sa gabii.
Gawas sa iligal nga droga nga nakumpiska usab ang.38 rebolber nga adunay mga bala ug nabawi usab sa mga otoridad ang buybust money nga gigamit sa operasyon.
Gumikan niini gipasidunggan sa DCPO ang PS-17 ni DCPO Acting City Director Marantan tungod sa gihimong pagpaningkamot aron mapahapsay ang dakbayan ilabi na sa iligal nga droga.
Busa nag-awhag karon ang opisyal ngadto sa katawhan sa kanunay nga pagsuporta sa mga otoridad ug paghatag ug impormasyon nga miresulta sa ilahang operasyon nga nagmalampuson.
