DAVAO CITY – Mikabat sa kapin 1.4 milyon pesos ang damyos nga gibilin sa baha human nga gibanlas niini ang mga umahan sa Kapalong Davao del Norte.
Sumala kang Municipal Disaster Risk Reduction and Management Office head Debbie Alilaya, anaa sa katibuk-ang P1,450,587 ang natala nga damyos sa pagbaha diin anaa sa 169 ka mag-uuma ang apekatado.
Partikular nga gibanlas sa baha ang mga basakan sa humay, mais, gulay, cacao ug saging gikan sa Brgy. Katipunan, Kapungagan, Simong, Tiburcia ug Pag-asa nga parehong sakop sa Kapalong, Davao del Norte.
Kahinumdumang gumikan sa pag ulan nga hatod sa trough sa Low-Pressure Area, gibaha ang pipila ka lugar sa Kapalong, diin anaa usab sa 27 ka pamilya ang gipailawon sa Pre-Emptive Evacuation.
Samtang sa Cabaywa, Asuncion, Davao del Norte, dunay sinko anyos nga bata ang nalumos ug 12 ka pamilya ang apektado sa pagbaha. Anaa usab sa P5 milyon ang kantidad sa agrikultura nga gibanlas.
Sa pikas bahin gisuspendi sa Mines and Geosciences Bureau ang operasyon sa small-scale miners partikular sa Davao de Oro, gumikan sa mga pag ulan hatod sa Low-Pressure Area gumikan sa risgo sa landslides.
Sumala kang MGB 11 Supervising Geologist Capter John Tubo, subay sa ilang Geohazard advisory, partikular nga gitumbok ang mga lugar sa Purok Ecoland, Sitio Diat, Barangay Napnapan, Pantukan, Davao de Oro nga dunay mga namatikdang pagdahili sa yuta ning bag-ohay lamang.
Gipasidan-an usab sa ahensya ang mga residente nga nanimuyo sa mining areas sama sa Diwalwal ug Mt. Diwata gumikan apil ang maong mga lugar sa gikonsiderang hazard prone areas.
Una ng nagrekomenda ang MGB og pre-emptive evacuation alang sa mga residente sa Monkayo, Davao de oro, dungan sa pahimangno nga makig-alayon sa local responders.
