Dul-an Lima ka milyon ang kinatibuk-an nga kantidad sa iligal nga droga kon shabu ang nakumpiska sa mga otoridad atol sa gilusad nga drug buybust operation. Subay sa report sa mga otoridad, gipahigayon ang operasyon sa Brgy Canatan, Asuncion Davao del Norte kagahapong adlawa nga miresulta sa pagkasikop sa duha ka mga durugista.
Giila ang mga dinakpan nga si alyas Taher ug alyas Jimboy nga mga residente sa nasampit nga lugar. Unang napalitan sumala pa ang mga suspetsado og iligal nga droga kon shabu sa kantidad nga P450,000.
Samtang atol sa gipahigayon nga pagsusi sa mga gamit sa mga suspek, nakumpiska pa ang napulo ka mga dagkong putos sa iligal nga droga kon shabu nga nagkantidad og P4.5 milyon. Sa kinatibuk-an mokabat sa P4.9 Million ang nasakmit sa mga otoridad. Gilusad ang anti-drug operation sa pagpanguna sa Philippine Drug Enforcement Agency (PDEA) ug mga sakop sa Regional Office 11, PNP Drug Enforcement Group 11, ug Asuncion Municipal Police Station.
Sa pagkakaron ang mga dinakpan ang gipasakahan na og kaso nga pagsupak sa RA 9165 ug anaa karon sa kostudiya sa mga otoridad.
