Mokabat sa 130 ka mga foreign delegations, lakip ang 50 ka mga heads of state ug 10 ka mga kasamtangang Hari ang gilauman nga motambong sa lubong ni Pope Francis, sumala sa pahayag sa Vatican.
Gibutyag sa Vatican nga posible pa kini nga madugangan hangtod Sabado, ang adlaw sa seremonya sa paglubong. Gianunsiyo usab sa Vatican nga ilahang gilugwayan nga oras sa public viewing sa haya sa mipanaw nga Santo Papa. Sa orihinal nga plano, gikatakda unta kining tapuson karong gabii, apan tungod sa daghan ang buot nga makit si Pope Francis sa iyang katapusang mga adlaw, ilahang gipalugway ang pagbisita.
Nasayran nga liboan ang mga nagpila, lakip na ang mga miabot pa gikan sa lain-laing mga nasod aron personal nga mosud-ong sa mahal nga Santo Papa. Sa sulod pa lamang sa usa ka semana, misaka na ang ihap sa mga langyaw ug turista sa Rome, nga buot masud-ong si Pope Francis.
Sumala sa mga opisyal sa siyudad sa Rome, posible nga malabwan pa ang ihap sa mga nagbangutan kung itandi sa panahon sa pagkamatay ni Pope John Paul II niadtong 2005.
