DAVAO CITY – Gikumpirma sa Bureau of Fire Protection (BFP) Davao nga nabugtoan sa kinabuhi ang duha ka mga bata sa care taker nga biktima sa pagbusikad sa tangke sa LPG sa Petronas Gas shop sa McArthur Highway sa Km. 7, Bangkal ning dakbayan sa Davao sa milabay nga adlaw.
Sumala pa ni Bureau of Fire Protection (BFP) Davao Fire and Arson Investigator Ramil Gillado nga namatay ang mga bata sa sulod sa hospital pipila ka oras ang milabay gumikan sa grabe paso sa kalawasan.
Una nang naila ang mga menor de-edad nga sila si Kaisha, 5 anyos, ug Christy, 9 anyos.
Nangamatay ang mga biktima gumikan sa grabeng pagkapaso ug sa nahanggap nga aso.
Kahinumdoman nga 16 ka tawo ang gi-rescue sa medical emergency team ug gidala ngadto sa Southern Philippines Medical Center (SPMC) aron nga katambalan.
Apan ang duha wala na makalahutay ug namatay.
Ang inahan sa duha ka mga bata nga namatay, nakahiagom sab ug 3rd degree burn ug namatay sab ang pito ka bulan nga gibuntis nga nakuha.
Sa 16 nga angol, 10 niini naka-angkon ug 3rd degree burn sa nagkadaiyang mga bahin sa kalawasan, samtang ang lain pang unom nga biktima naka-angkon ug 1st ug 2nd degree burn.
Padayon pa nga nagpaalim sa mga paso ug samad ang mga biktima sa SPMC.
Mukabat sa P1 ka Milyon ka pesos ang nahimong damyos sa nahitabong sunog nga resulta sa pagbusikad sa LPG.
