DAVAO CITY – Nasikop sa usa ka buy-bust operation ang duha ka tigpahuyot ug ilegal nga droga nga nailhang sila Alberto Camilo alyas “Al”, ug Abdul Rauf Enataran, mga hamtong ang pangidaron ug mga residente sa may Purok Centro Taganilao, Barangay Tamisan, Mati City, Davao Oriental, sa miaging gabii.
Gilusad ang maong operasyon sa nasangpit nga lugar uban ang hiniusang pwersa sa PDEA Davao Oriental, Davao Oriental Police Provincial Office ug Mati City Police Station.
Positibong nakuha gikan sa mga suspek ang usa ka pakete sa gidudahang shabu nga nagkantidad ug P1,000.
Samtang, lain pang dagkung mga pakete sa shabu ang nakuha nga dunay gibughaton nga singkwenta gramos ug mubalor sa kapin P750,000 ang kantidad.
Gipaslak na sa selda ang mga dinakpan nga mag-atubang ug kasong paglapas sa Republic Act 9165 kon Comprehensive Dangerous Drugs Act of 2002.
VIA || Bombo LJ Florendo
