DAVAO CITY – Nagkarambola ang duha ka mga sakyanan atol sa nahitabong aksidente sa Ciudades bypass road Barangay Mandug, Buhangin District, Davao City, kagahapon sa buntag.
Subay sa taho sa Mandug Police, nalambigit ang duha ka mga sakyanan atol sa aksidente diin giila sila Antonio Abadilla Jr, 34 anyos nga drayber sa usa ka TMX 125 nga motorsiklo ug nagpuyo sa Prk. 28 Bong-Bong, Panacan, Davao City ug ang kauban niining si Jhonlex Del Pilar; ug ang drayber sa pick-up nga si Jake Celiz, 31 anyos nga taga-Jacinto St., SIR Matina, Davao City.
Subay sa imbestigasyon, gikan Indangan padulong Maa ang drayber sa motorsiklo ug ang iyang kaubanan, samtang gikan Mandug paingon Indangan ang drayber sa pick-up.
Pag-abot sa paubos nga bahin sa Ciudades bypass road, ni-counterflow ang pick-up ngadto sa lane nga giagian sa motorsiklo apan pag-adto niini sa wala nga bahin sa atubangan, nibangga ang pick-up ngadto sa motorsiklo nga nagresulta sa pagkatumba-patay sa drayber sa motorsiklo ug pagkaligid sa yuta.
Nakahiagom og bun-og sa lawas ang duha ka sakay sa motorsiklo nga gitabang gilayon sa Central 911 ug nahatud sa SPMC.
Gikustodiya na sa PNP ang drayber sa pick-up nga mag-atubang og reklamo.
