Patay ang usa ka senior citizen nga nagmaneho sa motorsiklo human nga nabangga kini sa laing motor nga kasugat niini samtang naglawig kini sa C.P. Garcia Highway ning dakbayan sa Davao kaganihang buntag.
Subay sa report sa kapulisan, usa ka ginganlang og alyas Ed, 64-anyos nga residente sa Cabantian ning siyudad sa Davao ug usa ka ginganlan ug alyas Joni, 38-anyos nga lumulupyo sa dakbayan sa Digos ang nalambigit sa maong panghitabo.
Subay sa imbistigasyon sa otoridad nga samtang galatas ang motor ni alyas Joni sa maong dalan gikan sa kadalanan sa Panacan, nabanggaan niini ang biktima nga naggikan sa Mamay Road, paingon sa Cabantian nga direksiyon.
Nag-abot sumala pa ang duha sa maong dalan hinungdan sa pagkabangga ug pagka-angol sa nasampit nga motorista.
Dali nga narespondehan ang panghitabo sa medics sa Central 911 ug gidala sa balay-tambalan ang naangol nga biktima apan nakabsan kini sa kianabuhi pasado alas 7 sa buntag.
Sa karon ang mga motorsiklo ang anaa sa kostudiya sa kapulisan ingon man ang drayber usab sa motor nga nakabangga.
