Patay na nga miabot sa ospital ang usa ka 40-anyos nga motor rider human nga mibangga sa laing motorsiklo pasado alas Siyete sa gabii. Subay sa report sa mga otoridad, giila ang biktima nga si Karlo nga taga Manambulan Tugbok District ning dakbayan sa Davao.
Sa gihimong imbistigasyon sa kapulisan, usa ka Rusi nga motorsiklo nga gimaneho sa usa ka alyas Jay-18-anyos usa ka laborer nga taga Aracan, North Cotabato nga adunay backride nga 17-anyos nga si alyas Makoy. Sumala pa sa otoridad, paingon ang biktima sa Anggalan, Tugbok Dist. apan pag-abot niini sa Purok Crossing Barangay Tagakpan, Tugbok Dist.,ning siyudad mikalit sumala pa og overtake si Alyas Jay nga hinungdan sa pagkabangga sa kasugat niining motor nga gimaneho sa biktima.
Tungod sa kakusog sa pagbangga, nalagpot ang biktima og nabunal sa semento nga nakaangkon og bun-og sa kalawasan. Gidala pa sa ospital ang biktima apan gideklara kini nga dead on arrival. Samtang ang mga batan-on ang naangol usab sa maong panghitabo nga karon giatiman sa Southern Philippines Medical Center.
