DAVAO CITY – Gikatakda na nga pasakahan ug kasong kalapasan sa Republic Act 9165 kun Comprehensive Dangerous Drugs Act of 2002 ang duruha ka mga indibiwal nga nasikop sa managlahing operasyon nga gilusad sa mga sakop sa Davao del Norte Provincial Drug Enforcement Office sa Philippine Drug Enforcement Agency Regional Office XI diin ang unang operasyon gilusad sa Teachers Village, Barangay Sto. Niño, Panabo City, Davao del Norte.
Naila ang mga suspek nga sila si Erson Jun Lopez Sapules, Japhet Urbiztondo Ladimora ug Jufel Ladimora Primede.
Nasikop ang tulo human nga nagkunsabo ang mga nahisguta sa pagpamaligya ug usa ka sachet sa shabu nga kantidad sa P1,000.00 ngadto sa PDEA Agents nga nagpaka-arun ingnon nga poseur buyer.
Narekober sab sa ilang posisyon ang laing tulo pa ka mga pakete sa ginadili nga droga, nagkadaiyang drug paraphernalia ug marked money.
Samtang nasikop sab sa laing anti-drug operation sa PDEA Regional Office XI ang mga suspek nga nalambigit usab sa pagpamaligya ug ginadili nga droga sa National Highway, Panabo City, Davao del Norte.
Naila ang mga dinakpan nga sila si Joshua Tanio ug Irene Algarme, susama nga residente sa Barangay Malativas, Panabo City.
Namaligya ang mga nahisgutan ug duruha ka sachets sa shabu nga kantidad sa P 1,000.00 ug usa ka unit sa motorsiklo nga ilang gigamit sa transaksiyon.
Susama na karon nga gibalhug sa presohan ang mga suspek sa Philippine Drug Enforcement Agency Regional Office XI samtang ang mga nakumpiskang ginadili nga droga ang gipailalom na karon sa eksaminasyon sa PDEA laboratory.
