Usa ka lalaki ang nabiktima sa giingong robbery hold-up sa Zone 1, San Antonio, Brgy. Buhangin, Davao City, pasado alas 11:45 sa buntag, Hulyo 10, 2025.
Sumala sa imbestigasyon sa Buhangin Police Station ang biktima giila nga si Ralph, 32-anyos, usa ka residente sa maong lugar.
Sumala pa sa mga otoridad nga gikan si Ralph sa balay sa iyang kauban sa trabaho aron kuhaon ang usa ka parcel.
Apan sa dihang mosakay na unta siya sa iyang motorsiklo, kalit nga miduol ang usa ka wala mailhi nga lalaki nga nagsul-ob og itom nga jacket ug itom nga short.
Kini nga suspek mitutok og .45 kalibreng pistola sa tiyan sa biktima ug gikuha ang iyang brown nga sling bag nga adunay sulod nga cash nga ₱6,500, usa ka Honor cellphone nga nagkantidad og ₱24,000 ug ₱1,800 nga naa sa GCash account.
Pagkahuman sa insidente, misakay ang suspetsado sa usa ka XRM nga motorsiklo nga kolor black/blue nga walay plate number nga naghulat pipila ka metros ang gilay-on, ug mihawa padulong sa Brgy. Angliongto.
Padayon ang hot pursuit operation sa mga otoridad aron mailhan ug madakpan ang suspetsado.
Sa lain pang insidente, usa ka delivery rider ang gihold-up sa duha ka lalaki samtang nagtrabaho sa Blk 1 Lot 2, DSA Village, Balusong, Matina, alas 11:15 sa buntag sa mao gihapon nga petsa, Hulyo 10.
Ang biktima giila nga si Russell, 24-anyos, usa ka J&T Express rider ug residente sa Salakot, Purok 2, Talomo.
Sumala sa report sa Talomo Police Station, human niya modeliver og parcel sa balay sa Tomacul family, kalit nga miabot ang duha ka lalaki nga nagsakay sa motor ug nagsul-ob og crash helmet ug black bonnet.
Ang backrider mipakita og armas nga wala pa matino ang klase, ug gikulbaan ang biktima samtang gikuhaan siya sa iyang sling bag nga adunay mga ID, driver’s license, cash nga ₱4,000, iPhone nga cellphone ug incognition key sa motorsiklo.
Human sa insidente, misibat ang mga suspek padulong sa Tahimik Avenue sa Matina.
Ang mga otoridad sa Talomo Police Station padayon usab sa ilang hot pursuit ug follow-up investigation aron mahibal-an ug masikop ang mga responsable sa maong krimen.
