Nagpositibo ang duha ka mga drayber sa bus atol sa gipahigayon nga surprise drug test kagahapong adlawa sa Davao City Overall Transport Terminal subay sa Oplan Harabas nga gipangunahan sa PDEA, LTFRB ug LTO aron nga masiguro ang kaluwasan sa mga mobyahe padulong sa mga nagkadaiyang lugar karong kapaskuhan.
Nasayran nga ang duha ang gikan sa duha ka mga transport terminal nga sa kinatibuk-an adunay 50 ka mga drayber sa bus ug 20 sa mga van. Ang mga wala panganling drayber ang ipailawom una sa confirmatory test ayha kini desisyunan sa nasampit nga ahensya.
Sa laing bahin, sumala usab ni LTO-11 Regional Law Enforcement Section Head, Yuri Lim nga gawas sa suprise drug test, ginasuta usab niini ang kondisyon sa mga sakyanan.
Gipasalig usab sa opisyal nga adunay ipahigayon niini nga pagpanubay sa matag-adlaw sa mga terminal, kadalanan, ug bisan sa mga garahe sa mga provincial bus uban ang LTFRB.
Nagbutang usab og help desk ang LTFRB-11 aron nga mo-assist sa mga travelers sulod sa terminal.
Sa karon ang ahensya adunay giaprubahan nga special permits ngadto sa 22 ka mga bus units, subay sa aplikasyon sa mga kompanya sa bus. Kini nga mga bus ang mobyahe sa Davao-New Bataan, Davao-Tandag, ug Davao Kidapawan routes ug vice versa gawas sa naandan na nga ruta.
Gawas niini, adunay gipahigayon usab nga pagpanubay sa mga colurom nga mga sakyanan nga mopasakay ug mga pasahero gawas sa mga terminal.
Sa bahin usab sa pamunuan sa DCOTT, sumala pa ni Aisa Yusop nga adunay 700-800 ka mga byahe sa bus matag-adlaw nga kini ang giisip nga normal ang gidaghanon. Apan karon nga panahon sa kapaskuhan anaa sa 1k ngadto sa 1.5k trips matag-adlaw nga kini ang gilangkuban sa 50-80k ka mga pasahero matag-adlaw.
