Nakabsan sa kinabuhi ang usa ka menor de edad human nga nahugno ang usa ka tower pasado alas dyes sa buntag. Subay sa report sa kapulisan, giila ang mga biktima nga sila alias “Jay,” 16-anyos, usa ka estudyante nga residente sa Purok 7, Brgy. San Roque Digos City ug alias “Mark” 19-anyos.
Sumala pa sa kapulisan, nagtrabaho isip part time sa gitukod nga 60 ft. tower ang duha ka mga biktima pasado alas 10:00 sa buntag, kagahapong adlawa sa nasampit nga lugar sa usa ka internet service provider. Sumala pa, padulong na panaog niadtong tungura ang mga nahisgutan apan kalit nahugno ang tower ug nahulog ang mga biktima.
Dali nga gidala sa Davao Sur Provincial Hospital ang mga biktima apan gideklarang patay alyas “Jay” pipila ka oras ang nakalabay gumikan sa grabeng bun-og sa kalawasan. Samtang si alyas “Mark” ang nakahiagom usab og injury sa dughan. Sa karon, nagpadayon pa ang gihimong imbistigasyon sa kapulisan kabahin sa maong panghitabo.
