Nakakustodiya na sa City Social Welfare Development Office (CSWDO) ang 2 ka menor nga nalambigit sa pagpanglungkab ug pagbandal sa usa ka daycare center sa Mandug ning dakbayan.
Subay sa kumpirmasyon sa tigpamaba sa Davao City Police Station, P/Capt. Hazel Tuazon nga giila ang duha ka minor nga sila alyas “Lanz”, 16 anyos ug alyas “Taffy”, 17 anyos ug parehong residente sa nasampit nga lugar.
Kahinumduman nga dako na lamang ang kakurat ug pagkadismaya sa magtutudlo sa Daycare Center sa DDF Village, Barangay Mandug ning dakbayan niadtong Agosto 6 ning tuiga, alas 7 sa buntag human nga napuno og bandal og mga malaw-ay nga hulagway sa kinatawo sa lalake ang sulod sa classroom sa mga bata lakip na ang ngan sa gang nga nangransak kansa giilang Temple Street Gang kon TST gang.
Gani, gidagit sab sa mga nahisgutan ang P3,000 nga class fund sa mga bata ug giguba ang mga kabtangan sa sulod sa classroom sama sa TV ug uban pa.
Sa karon, ginahikay na ang kasong robbery ug malicious mischief nga ipasaka batok sa mga dinakpan.
