DAVAO CITY – Literal nga nakigkarera ngadto sa mga balay-tambalanan ang duha ka lalaki nga nalambigit sa usa ka drag race kon karera sa duha ka motorsiklo human sila parehong nadisgrasya sa Barangay Catalunan Grande, ning syudad sa Davao.
Sigun sa report sa Talomo Police, taknang alas-12 sa kaadlawon niadtong Martes, Nobyembre 16, parehos lango sa ilimnong makahubog ang duha ang mga biktimang giilang sila Kem Laurence Montesir, 18 anyos, taga-Mulig, Toril; ug Steven July Montejo Naval, 23 anyos, taga- Sitio Escuela, Barangay Catalunan Grande, Davao City.
Naghinagitay matud pa ang mga nahisgutan ug karera sa gamit ang ilang motorsiklo.
Pag-abot sa second round sa maong karera dapit sa Ruby Subdivision, Catalunan Grande, gibanggan ni Naval ang nag-unang motorsiklo ni Montiser hinungdan sa ilang pagkalagput daplin sa kwentador sa tubig ni Montiser ug sa poste sa kuryente ni Naval.
Gidala sa SPMC si Montesir apan nakabsan kini sa kinabuhi pagtungha sa ospital; samtang kritikal ang kahimtang ni Naval nga nagpa-alim sa Davao Doctors Hospital.
Gipanghimakak sa Talomo Police nga love triangle ang nahimong hinungdan sa insidente diin unang gikataho nga ilang gipustahan ang usa ka babaye. Wala na magpasang-at ug kaso ang duha ka kampo.
via || Bombo LJ Florendo
