DAVAO CITY – Dili tiaw nga kalipay ang gibati karon sa duha ka mga dabawenyo human gitudlo ni panuglong Rodrigo Duterte isip mga bag-ong commissioners sa Presidential Commission for the Urban Poor (PCUP).
Gi-appoint ni pangulong Duterte sila Norman Baloro ug Randy Halasan niadtong Enero 16 hulip kanila Manuel Serra Jr. Ug Joan Lagunda nga gipalapot sa pangulo niadtong bulan sa Disyembre sa nakalabay nga tuig gumikan sa naghinobrang ka-daghan sa pagbiyahe sa langyawng kanasuran.
Sumala pa ni Baloro kinsa head sa CSSDO sa Buhangin district ning dakbayan sa dabaw, walay kabutangan sa iyang kalipay sanglit dako ang pagsalig nga gihatag kaniya sa presidente nga mahuptan ug insakto ang nahigutang national position.
Tubag na sumala pa kini sa iyang mga pag-ampo nga unta adunay bugti ang iyang pagtinarong ug trabaho sa gobyerno.
Saksi ang mga dabawenyo sa ka-kugihan ni Baloro kinsa mangunay gayud sa pag-atiman sa katawhan ilabi na sa mga panahon sa kalamidad sama sa mga pagbaha ug panghitabong sunog sa dakbayan.
Samtang si Randy Halasan nga usaka magtutudlo, ang naila usab isip winner sa Ramon Magsaysay Award gumikan sa pag-amuma ug pag-matuto sa iyang mga tinun-ang Matigsalug.
