DAVAO CITY – Nangayo’g pasaylo ug naghatag og pagpaklaro sa publiko ang mga babayeng menor de edad nga walay nahitabong kidnapping diri sa dakbayan sa Davao.
Sa gipahigayong press conference kagahapon sa Davao City Police Office, gipanghimakak ni DCPO Director Alberto Lupaz ang mga naunang alegasyon mahitungod sa usa ka 14-anyos nga babaye na si alyas Joy nga gituohang gi-kidnap.
Saysay pa sa dalagita, Agosto 27 pa nga nilakaw siya sa ilahang balay human gikasuk-an sa iyang ginikanan ug giimbargohan pa og cellphone.
Nilakaw siya pagka-alas siyete sa gabii sa Binugao Gym ug sa dihang gihunungan siya sa usa ka pula nga pick up vehicle.
Boluntaryo lamang nga misakay ang dalagita padulong General Santos City uban ang drayber nga gitudlong suspek sab sa insidente.
Giawhag ang suspek nga makighilawas sila sulod sa sakyanan apan gikumpirma ni alyas Joy nga wala siya gihilabtan.
Nagpakitabang dayon sa GenSan City Police si alyas Joy aron makauli siya diri sa Davao.
Na-rescue sa mga sakop sa General Santos City PNP PRO 12 si alyas Joy niadtong Agosto 28.
Gihulagway ni alyas Joy ang maong suspek nga anaa sa 50-anyos pataas, lagumon, ug mubuon.
Temporaryo una nga dili maka-iskewla karung tuig si alyas Joy aron magpaayo gikan sa nasinatian niyang trauma.
Kasamtangang nakipag-alayon ang Davao City Police ngadto sa General Santos City Police alang sa mas halawon nga imbestigasyon ug pagdakop sa maong suspek.
Sa pikas bahin, sa susamang press conference kagahapon, anaa ang dyise syete anyos nga si alyas Christine, taga-Matina Aplaya ning dakbayan, nga daw usa ka biktima sa kidnapping.
Susama sab sa nahimong kasinatian ni alyas Joy nga migawas lamang gikan sa ilang balay niadtong Agosto 23 tungod sa iyang gihambin nga personal nga mga isyu ug problema sa panglawas.
Misakay siya og bus padulong Bukidnon gamit ang kwarta nga ipang-enroll unta sa usa ka kolehiyo sa dakbayan.
Usa ka lola ang nagtabang kaniya sa iyang temporaryong pagpuyo sa Bukidnon hangtod Agosto 28.
Nakauli na si Christine sa iyang balay human nga gisundo siya sa iyang iyaan ug uyuan.
Nangayo og pasaylo ug pagsabot si alyas Christine atubangan sa publiko ug iyang gisaway sab ang mga sayop nga impormasyon mahitungod sa iyang binuhatan.
Nagsaad ang DCPO nga tabangan si alyas Christine alang sa iyang pag-iskwela karong tuig isip Grade 12 student.
Sila alyas Joy ug alyas Christine, mupasailawom sa counselling sa women’s and children’s protection desk sa Ecoland Police Station.
Miapela karun ang Davao City Police Office nga magbinantayon batok sa mga dautang elemento ug likayan ang paghatag og sayop nga impormasyon sa social media aron dili kini magdala og hulga pangseguridad sa katawhan.
via || Bombo LJ Florendo
