Malampuson nga nahimo sa Bombo Radyo Philippines, kauban ang Bombo Radyo Philippines Foundation, Inc. ug ang Philippine Red Cross, ang Dugong Bombo 2025, ang labing dakong single-day voluntary bloodletting event sa nasod.
Gipahigayon kini dungan sa 25 ka mga nag-unang lugar sa tibuok Pilipinas, uban ang 32 ka mga fully digitalized AM ug FM stations sa network.
Bisan pa sa kadaut nga gidala sa kusog nga bagyo ug kusog nga linog nga miigo sa pipila ka rehiyon, nalabwan sa Dugong Bombo karong tuiga ang record sa milabay nga tuig.
Nagpamatuod kini pag-usab sa kusog, kadasig, ug espiritu sa boluntaryong pagtabang sa katawhang Pilipino.
Miabot sa 4,657 ka bag sa dugo ang nakolekta, tugbang sa 2,095,650 cc, 2,095.65 litros, o 553.61 galon, o dul-an 10 ka drum nga dugo nga makaluwas ug kinabuhi.
Taliwala sa padayon nga pagbag-o sa nasod gikan sa mga kalamidad, misamot ug makahulogan ang maong tinuig nga kalihokan.
Mga Pilipino gikan sa lain-laing sektor—mga estudyante, mamumuo, unipormadong personnel, propesyonal, ug mga organisasyong pangkomunidad mihatag ug dugo bisan pa sa kalisod sa panahon.
Ang ilang kaisog ug kalooy nagpakita sa lig-on nga bayanihan nga naghulma sa identidad sa mga Pilipino.
Sulod sa halos duha ka dekada, ang Dugong Bombo nagsilbi nga importante nga lifeline alang sa mga komunidad sa tibuok kapupud-an.
Matag tuig, liboan ka mga yunit sa dugo ang gihatag aron masuportahan ang mga pasyente sa panahon sa emerhensiya, pagpanganak, operasyon, tambal sa kanser, ug ubang kritikal nga panginahanglang medikal.
Uban sa tema nga “A Little Pain, A Life to Gain,” gipasiugda sa programa nga bisan mubo lamang ka minuto ug gamay lamang nga kasakit ang imong maagian sa pagdonar ug dugo, kini makatabang sa paghatag ug lain pang higayon sa kinabuhi sa imong isigkatawo. Bisan pa sa mga modernong teknolohiya sa medisina, nagpabiling walay kapuli ang dugo sa tawo, busa ang mga boluntaryong donor usa ka mahinungdanong kauban sa pagluwas ug kinabuhi.
Nagpahayag usab ang Catholic Bishops’ Conference of the Philippines (CBCP) sa tibuok nga suporta alang sa Dugong Bombo 2025.
Giawhag nila ang mga tumotuo sa pag-apil, ug gihulagway ang pagdonar ug dugo isip usa ka buhat sa pagtuo, pagpakita ug kaluoy sa isigkatawo, ug gugma sa isigkatawo usa ka tinood nga pagpadayag sa misyon sa Kristiyanismo sa pagpanalipod ug pagtahod sa dignidad sa kinabuhi.
Sa pagtapos sa Dugong Bombo 2025, gipamatud-an pag-usab sa Bombo Radyo Philippines, uban sa mga kauban niini, ang ilahang saad sa makataong serbisyo, pagpadasig sa komunidad, ug pagtinabangay sa pag-uswag sa nasod.
Ang tinuig nga inisyatiba nagpamatood sa misyon sa network nga magluwas ug kinabuhi sa matag mahinungdanon nga donasyon.
Nagpasalamat ang Bombo Radyo Philippines sa:
– tanang malampusong donor
– mga donor nga wala makapasar apan nagpamatuod sa andam nga pagtabang
– mga boluntaryo ug medical teams
– mga sponsor ug kauban nga institusyon
Daghang salamat sa inyung tanan. Basta Radyo Bombo!
