Andam na ang Bombo Radyo Philippines, kauban ang Bombo Radyo Philippines Foundation, Inc. ug Philippine Red Cross, sa pagsugod karong adlawa, Nobyembre 15, 2025, , sa paglusad karong Nobyembre 15, 2025, sa Dugong Bombo 2025 nga pagahimoon sa Gaisano Mall of Bajada, Davao City nga magsugod gikan alas 8 sa buntag hangtod alas 5 sa hapon, diin giilang labing dako ug madugoong single-day voluntary blood donation event sa nasud nga ginahimo dungan sa 25 ka dagkong lugar nationwide.
Mas lawom ang kahulugan sa karong tuiga nga edisyon sa Dugong Bombo, hilabina samtang nagpadayon ang nasud sa pagbangon gikan sa sunod-sunod nga makusog nga bagyo ug kusog nga linog nga miigo sa lain-laing rehiyon.
Gipasaka niini ang panginahanglan sa lig-on ug igo nga blood supply, hinungdan nga mas napakita ang kaimportante sa mga inisyatibang gihaw-as mismo sa komunidad sama sa Dugong Bombo.
Gilauman ang libo-libo katao gikan sa government agencies, civic organizations, religious groups, eskwelahan, unipormadong personel, pribadong kompanya ug mga individual donors nga mosalmot pag-usab uban ang kaisog ug kalooy alang sa katawhan nga nagkinahanglan.
Dako sab ang papel karong tuiga sa Catholic Bishops’ Conference of the Philippines (CBCP) nga naghatag og bug-os nga suporta sa maong kalihokan, ug nanawagan sa mga tumatan-aw sa pag-salmot usab isip konkretong pamaagi sa pagpakita sa pagtoo, pagtabang ug pagpakabana.
Sulod sa kapin duha ka dekada, ang Dugong Bombo nagpadayon nga lig-on nga tinubdan sa dugo alang sa blood banks, mga ospital ug emergency response units, nga matag tuig nakatabang sa pagluwas sa libo-libong kinabuhi.
Ang epekto niini magpabilin bisan pa human sa adlaw sa kalihokan—gikan sa yano nga pagdonar ngadto sa dakong tinguha sa paghatag ug paglaum.
Ilalom sa tema nga “A Little Pain, A Life to Gain,” gipahinumduman ang matag Filipino nga bisan gamay ra ang kasakit ug pipila ka minuto nga panahon sa pagdonar ug dugo, kini mahimong hinungdanon nga kalainan alang sa usa ka tawo nga nagkinahanglan ug dugong makaluwas ug kinabuhi.
Bisan pa sa teknolohikal nga kalamboan karon, wala gihapon kapuli ang dugo sa tawo sa oras nga emerhensiya.
Samtang nagpadayon ang Dugong Bombo 2025 sa lain-laing bahin sa nasud, gipasiguro sa Bombo Radyo Philippines, uban ang Bombo Radyo Philippines Foundation, Inc. ug Philippine Red Cross, ang ilang hugot nga paningkamot sa pagserbisyo publiko, pagpalig-on sa komunidad, ug pagluwas sa kinabuhi—usa ka mahal nga donasyon sa matag higayon.
