DAVAO CITY – Gitun-an na karon sa konseho ning dakbayan ang dugang polisiya aron nga mapugngan ang transmisyon sa coronavirus disease (COVID-19) ilabi na ang physical distancing samtang adunay pandemya.
Sumala pa kang Konsehal Mary Joselle Villafuerte, chairperson sa committee on health, mapalig-on sa pagpatuman sa nahisgutan nga lakang ang pagpahamtang og multa sa mga mosupak niini.
Unod sa sugyot, mamahimong pahimangnuan lamang una ang mga indibidwal apan kung magmagahi, mamahimo kini nga pamultahon og P5,000 o pagkabilanggo sulod sa unom ka bulan ang mga violators sa nahisgutan nga balaod.
Gi-angkon sa opisyal nga lisud nga mapatuman ang lakang kung walay balaod nga magpahamtang og silot sa mga mosupak niini.
Unod sab sa ordinansa nga mamahimong masilotan ang mga business o office owners nga mapamatud-an nga wala nagpatuman og physical distancing o walay distance markings sa ilang mga opisina o establisyemento.
Ang nahisgutan nga sugyot ang napalabang na sa second reading sa 19th city council.
