Gipadayag sa transport group nga MANIBELA nga dili igo ang gi-aprubahang P1 nga dugang pamasahe sa tanang public utility vehicles (PUVs) taliwala sa pagsaka sa presyo sa lana.
Matod ni MANIBELA President Mar Valbuena, mas dako pa kuno ang kita sa uban nga nagapanglimos kaysa sa kita sa mga drayber sa jeep.
Sumala sa Land Transportation Franchising and Regulatory Board (LTFRB), magsugod ang P1 nga dugang pasahe sa traditional jeepneys sa unang upat ka kilometro gikan P13 ngadto sa P14, ug adunay dugang nga 20 sentimos matag kilometro gikan P1.80 ngadto sa P2.
Alang sa modern jeepneys, mosaka og Dos pisos ang minimum fare gikan P15 ngadto sa P17.
Samtang gibutyag niini nga dili lakip ang regular taxis ug motorcycle taxis.
Sa wala pa ang desisyon, nangayo ang MANIBELA og P2 nga dugang pasahe sa traditional jeepneys tungod kay daghang drayber ang naalkansi og P400 hangtod P500 matag adlaw tungod sa mahal nga diesel.
Tungod niini, napugos sumala pa ang ubang drayber nga usbon ang ilahang iskedyul aron malikayan ang kompetisyon sa pasahero, ilabi na sa off-peak hours.
