Gikatakdang magpagawas ang Anti-Money Laundering Council (AMLC) og dugang nga mga freeze order batok sa mga assets ug bank accounts sa mga tawo nga nalambigit sa mga anomaloso nga flood control projects.
Sumala ni AMLC Executive Director Matthew David, wala pa matapos ang imbestigasyon sa konseho ug nagpadayon pa ang ilang pagsusi sa mga kadudahang account.
Matod niya, adunay gipaabot nga dugang freeze orders, apan wala pa kini’y klaro kung ipagawas ba karong semanaha o sa sunod semana.
Bag-ohay lamang, gibutyag ni David nga napagawas na nila ang ikalima nga freeze order, nga naglakip sa mga bank account, insurance policies, sakyanan, real properties, ug e-wallet accounts.
Kahinumdoman, mipirma og kasabutan ang AMLC uban sa Independent Commission on Infrastructure (ICI) nga gitukod ni Pangulong Ferdinand Marcos Jr., aron palig-onon ang kooperasyon tali sa mga ahensiya sa gobyerno sa padayong imbestigasyon sa mga anomalya sa proyekto.
