Miabot na sa 500 ka mga biktima sa war on drugs ni kanhi Pangulong Rodrigo Duterte ang mihangyo nga marehistro isip opisyal nga partisipante sa kaso sa International Criminal Court o ICC.
Sumala sa upat ka pahinang dokumento gikan sa ICC Registry, nakadawat ang ICC Pre-Trial Chamber 1 og dugang nga mga aplikasyon gikan sa mga giingong biktima.
Napasa na sa Chamber 227 ang aplikasyon sa kapin 500 ka indibidwal. Niadtong Enero 28, 2026, gimando sa Chamber ang Victim Participation and Reparations Section nga iproseso ug isumite kini hangtod Pebrero 9.
Una niini, niadtong Enero 26, nagpagawas og desisyon ang Chamber nga nagtugot sa partisipasyon sa 39 ka biktima sa kaso.
Giklaro sa maong desisyon nga sakop sa imbestigasyon ang mga biktima sa murder ug attempted murder gikan Nobyembre 1, 2011 hangtod Enero 30, 2016 sa Davao City, lakip usab ang mga insidente nga nahitabo sa tibuok nasud gikan Enero 2016 hangtod Marso 2019.
Niadtong Pebrero 10, gimando usab sa Chamber ang depensa ug prosekusyon nga mosumite og updated nga listahan sa ebidensya nga gikatakdang ipasa niadtong Pebrero 13.
Kahinumduman nga sumala sa opisyal nga rekord sa gobyerno, kapin 6,200 ka drug suspects ang namatay sa mga anti-drug operations atol sa administrasyon ni Duterte.
Apan, sumala sa mga human rights organizations, miabot sumala pa sa kapin 30,000 ka mga indibidwal ang giingong namatay nga nalambigit sa kampanya kontra droga.
