Gilusad sa Department of Trade and Industry (DTI) ug Small Business Corporation (SB Corp) ang OFW Negosyo Fund, usa ka programa nga nagtumong sa paghatag og puhunan ug pinansyal nga suporta alang sa mga Overseas Filipino Workers (OFWs) ug sa ilang mga pamilya nga gustong magsugod o magpalambo og negosyo sa Pilipinas.
Ubos sa maong programa, ang mga start-up nga negosyo mahimong makahulam og kapital gikan ₱30,000 hangtod ₱300,000. Samtang ang mga MSMEs o Micro, Small, and Medium Enterprises nga adunay nagpadayong operasyon, mahimong makahulam og kantidad nga moabot hangtod ₱20 milyon.
Usa sa mga nag-unang bentaha sa maong pautang mao nga wala kini kinahanglang kolateral alang sa mga bag-ong manghulam hangtod ₱3 milyon, ug alang sa mga kaniadto nang borrower hangtod ₱5 milyon.
Dugang pa, naghatag usab ang programa og flexible nga terms nga mahimong moabot hangtod lima ka tuig, uban sa grace period aron makahatag og igong panahon sa mga negosyante nga makabangon ug makabawi sa ilang negosyo.
Mamahimong mo-apply ang balikbayan nga OFW, pamilya sa OFW, MSMEs nga gipanag-iyahan sa OFW, ug mga bag-o ug daan nga rehistradong negosyo.
Sumala sa SB Corp, lakip sa mga nag-unang kinahanglanon sa pag-aplay ang government-issued ID, Mayor’s Business Permit, proof of bank account, ug uban pang corporate documents kon gikinahanglan.
