DAVAO CITY – Walay nakitang pagsupak sa gipahigayong price monitoring sa mga palaliton ang Department of Trade and Industry (DTI) Davao City sa 48 ka mga business establishments sa syudad.
Dugang gipahayag ni DTI-Davao City Director Rachel Remitio, nga gusto usab nilang ipahibalo sa publiko nga kaniadtong January 27 gipatuman sa nahisgutang ahensya ang bag-ong Suggested Retail Price (SRP) nga nagtugot ug 10 porsento nga usbaw sa presyo sa mga basic commodities ilabi na sa mga delata ug sa mga tinapay.
Gi-usbawan ug dos-pesos ang mga tinapay ug dos-pesos ngadto na sa tres-pesos sa mga delata.
Gipahayag pa sa opisyal nga gipatuman ang price adjustment gumikan sa pagsaka sa presyo sa mga raw-materials.
Gikanayon pa sa tinubdan nga nagreklamo ang mga manufacturer sa mga delata nga misaka ang presyo sa imported tin cans ug 133 percent sukad niadtong milabay nga tuig.
Gipahinumduman usab niini ang mga business establishments nga likayan ang pagpasaka pa sa presyo sa ilahang paninda nga milabaw na sa suggested retail prices, samtang gi-deploy sa nahisgutang ahensya ang mga personahe niini matag semana aron i-monitor ang presyo sa mga palaliton.
