DAVAO CITY – Nanguna ang mga sakop sa Department of Trade and Industry (DTI) XI sa pagpanubay sa mga barber shop ug salon nga nangabli na partikular na sulod sa mga mall sa siyudad.
Gihimo ang maong lakang aron masiguro nga motamud ang mga nahisgutan sa tukma nga health protocols sama sa paggamit ug face mask ug face shield, physical distancing, ingon man pagpahimutang ug alcohol station.
‘Kauban sa DTI XI ang Department of Labor and Employment (DOLE) XI ug City Government of Davao sa ilang gipahigayon nga inspeksyon.
Gitataw sab ni DTI Fair Trade and Enforcement Bureau Director Ronnel Abrenica, wala silay nakita nga pagsupak sa mga barber shop ug salon diin gidayeg niini ang hugtanon nga pagtamud sa mga guidelines batok sa Corona Virus Disease o CoViD 19.
Kalakip sab sa ilang gibisita ang mga restaurants aron masayran kung unsa ang ilang gihimo nga pagpangandam sa higayon nga tugtan na ang mga dine-in kung ipailalom na sa Modified General Community Quarantine ang lungsod.
Gi-awhag sab sa DTI XI ang mga negosyante nga ipatuman ang cashless transaction sa mga tindahan isip dugang preventive measure aron nga mapugngan ang pagkatag sa CoViD-19.
