DAVAO CITY – Giklaro karon sa buhatan sa Department of Social Welfare and Development (DSWD) XI nga kinahanglan pa nga i-assess ug i-verify sa mga social workers ang mga indibidwal nga magsumite sa ilang aplikasyon aron maka-avail sa ipang-apud-apud nga Educational Assistance alang sa mga Indigent Students.
Sa pakighinabi sa Bombo Radyo Davao kang Michelle Franca, Information Officer sa DSWD XI, gipaklaro niini nga existing na kaniadto pa ang maong Educational Assistance diin ilalom kini sa Assistance to Individuals in Crisis Situation (AICS) Program.
Ilalom sa updated guidelines sa Memorandum Circular 15 series of 2022, mamahimong mag-request og educational assistance ang mga bread winners, working students, abandoned, anak sa solo parents, anak sa mga unemployed nga ginikanan, mga anak sa OFWs, mga anak sa mga ginikanan nga adunay sakit, mga biktima sa domestic violence ug mga nabiktima sa kalamidad.
Gipaklaro sab ni Franca nga aron maka-avail sa maong educational assistance, kinahanglan nga muagi usa sa tagsa-tagsa ka mga LSWDO , MSWDO o CSWDO aron makakuha og ‘Certificate of Indigency’. Ang mga social workers ang mag-assses sa mga nahisgutan aron mapamatud-an nga anaa gayud sa krisis nga kahimtang ang usa ka indibidwal o pamilya.
Kung aduna nay certificate of indigency, mamahimo na nga mag walk in o mubisita sa mga opisina sa DSWD ang mga buot mag-apply dala ang ubang rekisitos sama sa certificate of enrollment or registration, mamahimo sab gamiton ang statement of account sa mga school fees ug alang sa mga college students, kinahanglan ang valid school IDs.
Kahinumduman nga subay sa anunsyo ni Social Welfare Secretary Erwin Tulfo, mamahimong makadawat ang mga kwalipikadong Indigent Student og ayuda nga dakong tabang na alang sa pagtungha sa mga nahisgutan. P1,000 ang madawat sa mga Elementary School Students, Php 2,000 alang sa High School Students, Php 3,000 alang sa Senior High School Students ug Php 4,000 alang sa Vocational /College Level Students.
