Giklaro sa Department of Social Welfare and Development nga dili awtomatiko nga makadawat og benepisyo ang tanan nga nag-atiman sa anak nga nag-inusara ubos sa Republic Act No. 11861 o Expanded Solo Parents Welfare Act.
Sumala kang Social Welfare Officer IV Jocelyn Vince Cruz, kinahanglan ang aplikante mao gyud ang adunay tibuok responsibilidad sa pag-atiman ug suporta sa anak, ug wala’y co-parenting o regular nga tabang gikan sa kanhing asawa o paryente.
Tinuig nga gi-renew ang Solo Parent Identification Card (SPIC) ug moagi sa beripikasyon sa LGU.
Base sa datos sa DSWD, adunay kapin sa 260,000 ka rehistradong solo parents sa nasud, samtang 291 ka LGU ang naghatag og binukan nga subsidiya. Apil sa mahimong ilakip nga solo parents ang legal guardians, adoptive ug foster parents, ug pipila ka paryente nga nagdala sa responsibilidad sa ginikanan.
Ang balaod usab naglangkob sa dependents hangtod 22 anyos, basta walay asawa, walay trabaho, ug nag-eskwela.
Gipahimutang usab sa DSWD ang usa ka unified ID system alang sa solo parents, nga target ipatuman sa tibuok nasud sa 2026.
