DAVAO CITY – Gibutyag sa Department of Social Welfare and Development (DSWD) Davao Region nga nakahatag sila ug kinatibuk-ang P259,596,486 nga pondo alang sa tanan local government units (LGUs) sa rehiyon alang sa Supplementary Feeding Program kaniadtong 2017.
Matud pa kang DSWD-Davao public information officer Carmela Duron nga adunay 90,057 ka mga bata ang naka-benepisyo sa maong programa.
Gikanayong ang nahisgutan lamang sumala pa nga ihap sa mga bata ang nakapahimulos sa programa sa milabay nga tuig.
Gikan sa 90,057, naserbisyohan sa ahensiya ang 14,472 ka mga bata sa Davao del Sur kalakip na dinhi sa dakbayan, 29,144 sa Davao del Norte, 9,057 sa Davao Occidental, 17,218 sa Davao Oriental, ug 20,166 sa Compostela Valley.
Tumong sa feeding program sa DSWD nga mapalambo ang nutritional status sa mga kabataan sa Child Development Center sa Day Care Centers latas sa tibuok nasud pinaagi sa probisyon sa supplementary feeding.
Gigahinan sumala pa sa maong programa ug P15 ang matag bata sulod sa 120 ka adlaw.
Sa nahisgutan nga ihap, P11 ang gamiton aron nga ipalit ug sud-an sa matag bata samtang P4 ang sa kan-on.
