Gipalig-on karon sa Department of Social Welfare and Development (DSWD)-Davao, uban ang kapulisan, ang ilang kampanya batok sa online sexual abuse and exploitation of children (OSAEC) sa tibuok Davao Region.
Ang maong lakang naggikan sa serye sa mga kaso sa pagpang-abuso sa mga menor de edad nga gihimo pinaagi sa digital platforms, diin ang kasubo, ang ubang mga ginikanan o guardian pa mismo ang nalambigit sa mga kalapasan.
Matod ni Assistant Regional Director for Operations Gemma D. Dela Cruz, ang kakulangan sa kita ug oportunidad sa mga pamilya usa sa mga hinungdan nga nagdala sa pipila ka ginikanan sa pagbuhat og ilegal nga binuhatan.
Gibutyag niya nga ang kapobrehon usa ka dakong hinungdan sa pagduso sa mga ginikanan sa pagpamugos sa ilang mga anak sa mapintas nga online nga pagpang-abuso.
Sa kasamtangang datos, 11 na ka mga menor de edad ang malampusong naluwas sa coordinated operations sa DSWD ug mga otoridad karong tuiga.
Kining mga biktima kasagarang gikan sa Davao Oriental, Davao de Oro, ug Carmen sa Davao del Norte.
Padayon karon ang mga ahensya sa paghatag og psychosocial nga tabang alang sa mga nabiktima, samtang gipatuman sab ang hustong imbestigasyon aron maatubang sa balaod ang mga responsable.
