DAVAO CITY – Sikop sa gilusad nga drug buy bust operation sa mga sakop sa Bunawan PNP pasado alas kwatro kagahapon sa hapon ang usa ka lalaki nga notadong tigpayuhot ug ginadili nga droga.
Naila ang suspek nga si Niño Borres, 38 anyos residente sa Bunawan ning dakbayan sa Davao.
Matud pa kang Police Chief Inspector Estrelio Ramiso ang hepe sa Bunawan PNP, mitahan na kaniadto ang suspek gumikan sa maong binuhatan apan ilang nasayran nga subli kini nga mibalik sa pagpamaligya ug illegal drugs hinungdan nga ilang gilusad ang imbestigasyon nga maoy hinungdan sa pagkasikop niini.
Giplano na sab kaniadto ang pagdakop sa nahisgutan apan nakaikyas sumala pa kini sa otoridad.
Gi-andam na karon sa Bunawan PNP ang pagduso ug kasong kalapasan sa Republic Act 9165 kun Comprehensive Dangerous Drugs Act of 2002.
Samtang nasayran sab kang PCI Ramiso nga sulod pa lamang sa usa ka semana nga paglingkod niya isip hepe sa Bunawan PNP, upat na ka mga buy bust operation ang ilang gilusad.
Gi-angkon sa opisyal nga ubay-ubay pa ka mga nalambigit sa ginadili nga droga sulod sa ilang AOR ang ilang hatagan ug pagtagad hinungdan nga laoman ang pagpahigayon ug daghanan pa nga mga buy bust operation.
Nanawagan na lamang ang opisyal sa publiko ilabi na sa mga nahilakip sa tok-hang nga mas maayong mobiya na lamang sa maong bisyo gumikan kay dili dili magpanuko nga pagdakpan ang mga nahisgutan ilabi na nga hugtanon karon ang ilang kampanya batok niini.
