DAVAO CITY – Kanunay ang pahimangno sa kapulisan sa mga nalambigit sa ginadili nga druga nga mas maayong malinawon nga motahan sa higayon nga madakpan atol sa operasyon.
Tipik lamang kini human nga patay ang usa ka 35 anyos nga lalaki human na mipakita kini ug pagsukol sa otoridad dihang gilusad ang drug buy bust operation sa Purok 1 Barangay 76-A Bucanan ning dakbayan sa Davao pasado ala una kagahapon sa hapon.
Gipangunahan sa mga sakop sa Station Drug Enforcement Unit (SDUE) ang operasyon batok sa suspek nga si Gilbert Pundoc Aplasin, ulitawo, walay trabahio ug residente sa Purok 1, Brgy. 76-A Bucana ning dakbayan sa Davao.
Napalitan sa nagpaka-aron ingnon nga buyer ang suspek ug usa ka taas nga pakete sa ginadili nga druga bugti sa P500 nga marked money apan dihang nasayran nga pulis ang iyang ka-transaksiyon, mibunlot sumala pa kini sa iyang armas ug gipusil ang pulis apan nabalsan kini hinungdan nga nakaangkon ug samad pinusilan sa iyang lawas. Dali pa nga gidala sa SPMC ang suspek apan gideklara kining dead on arrival sa mga doktor.
Narekober sa crime scene ang usa ka unit sa caliber .38 revolver, usa ka balinis, laing tulo ka mga fired cartridge cases nga gituohang iya sa Cal. 9mm nga anaa karon sa kustodiya sa otoridad.
Dihang gihiling ang patay’ng lawas sa suspek narekober sab sa iyang posisyon ang laing unom pa ka mga pakete sa ginadili nga druga, ug usa ka P500 nga buy bust money.
Nasayran nga ang napatay nga suspek mao ang Top 2 Drug personality gumikan kay notado sumala pa kini nga nalambigit sa illegal nga aktibidad sa Boulevard ug Agdao area.
Gikanayong malampuson ang operasyon sa otoridad gumikan sa tabang sa Barangay Intelligence Network nga maoy nagapadala kanila ug impormasyon kalabot sa mga illegal nga aktibidad sa lugar.
Ang mga narekober nga drug items gikan sa suspek adunay market value nga P3,500.00 ug gikatakda nga ipailalom sa laboratory examination sa RCLO-11.
