DAVAO CITY – Arestado ang 5 ka mga indibiduwal sa matud pa nadiskobreng drug den sa Emerald Street, Barangay Pampanga, Davao City alas 9:50 kagabii.
Sa report sa Philippine Drug Enforcement Agency (PDEA) XI nagpahigayon sila og joint operation uban ang Sasa Police Station kon asa nadakpan sa drug buy bust si Joven Wabina, 34, residente sa nasangpit nga lugar.
Dugang sa nasangpit nga operasyon ang pagka diskobre sa matud pa drug den og naaresto ang naga mintinar niini nga si Rainer Sandoval uban sa mga gitoohang kustomer nga silang Lionel Dela Cruz, Almar Impas ug Sherwin Martin.
Atol sa maong operasyon nakuha ang ubay-ubay nga pakete sa gitoohang shabu nga dunay katibuk-ang kantidad nga mukabat ngadto sa P180,000 uban ang mga nagkadaiyang drug paraphernalia.
Himas rehas na karon ang mga dinakpan kinsa gipasakaan na og kasong paglapas sa R.A 9165 o Comprehensive Dangerous Drugs Act of 2002.
