DAVAO CITY – Gipuhag sa hinusang pwersa sa Philippine Drug Enforcement Agency ug National Bureau of Investigation sa Davao Region ang usa ka drug den sa Purok 1-B, Barangay 76-A Bucana ning Dakbayan sa Davao.
Nadakpan nila atol sa operasyon ang walo ka mga indibidwal, diin ang usa ka Rudy Valdez, 44 anyos, ang nanimuyo sa maong dapit.
Napalitan kini og usa ka pakete sa gituohang shabu nga dunay kantidad nga 1,000 pesos sa usa ka nagpaka-aron ingnong buyer.
Giila usab ang pito ka mga indibidwal nga parokyano sa maong drug den nga sila Rambo Andulao, John Mark Baguinda, Joshua Demain, Kenneth Dunguran, Goljhne Dymsoy, Patrick Henry Escandor ug Jamil Abdul Rahman, kinsa nag-shabu session pa sa drug den.
Nakuha sa mga otoridad ang unom ka laing pang mga pakete sa gituohang shabu nga mubalor ngadto sa 300,000 pesos ug uban pang mga shabu paraphernalia.
Gikustodiya na sa mga otoridad ang mga dinakpan alang sa tukmang disposisyon.
Pasakaan og kasong paglapas sa Republic Act 9165 kon Comprehensive Dangerous Drugs Act of 2002 ang mga dinapkan.
